水泥股壞消息出盡諗得過

特區政府眼見主動賣地及提高豪宅印花稅都無法令樓市升勢掉頭，趁住黑色星期五再出招，主動推出三幅地皮拍賣，一手樓樓花期唔准摸貨轉售，交易取消訂金亦由5%提高到10%。另外，針對半豪宅至豪宅的炒風，金管局畀銀行按揭指引，2,000萬元樓上只借六成，降低門檻到1,200萬元樓上都只借六成。

短期樓市或多或少有心理影響，但中長線睇，筆者擔心政府再一次好心做壞事！自去年十月，金管局訂2,000萬元只借六成的指引，炒豪宅熱錢明顯流向中細價樓市場，對普羅市民影響更深，唔信？睇番差餉物業估價署數字，去年十月底到今年六月，實用面積160平方米（約1,722平方呎）樓價指數累積升咗5.4%，但同期40平方米（約430平方呎）及40至70平方米（430至753平方呎）的中小型住宅，升幅仲勁，有12.4%及9.9%，降六成按揭界限推到1,200萬元，將豪宅炒風「妖魔化」，或者可以減低銀行風險，但能否就此遏抑整個樓市升勢，筆者甚有保留。

講到尾，樓價失控同資金成本與回報錯配有關。今日用茄薯借畀美國同日本兩個大國，利息都只係得2.7厘及1厘（兩國十年債息），回報低得可恥，基於兩地經濟都係得個「差」字，香港位處中國南大門，內地經濟增長維持8至9%，香港點都唔衰得去邊，民生經濟與當前超低利率根本唔配合，除非聯匯取消又或者中國經濟突然快速收縮，否則嚴重負利率加埋借錢唔使本，政府要扭轉市民對經濟及樓價向好的預期，會係相當艱巨。

煤價見頂對行業有利講番股票，自中央遏抑樓市措施出台，需求預期降溫，水泥股所受的影響唔細，亞洲水泥（00743）半年業績就倒退56.7%，得1.4億元人民幣，低過預期。上半年，賣掉800萬噸水泥，有34%升幅，但銷售額只升15.2%，多得水泥價格唔爭氣，毛利倒退33%之多，管理層解釋，是外省水泥大量湧入四川令價格受壓。另外，氣候也影響水泥需求，煤價維持高企也對水泥生產不利。

總括而言，同汶川大地震後，一廂情願認為區內水泥需求因災後重建上升有所落差，事實各水泥廠都擴大產能，供過於求情況更甚。

近期留意到另一間台灣同業，台泥國際（01136）對業績展望都相當避重就輕，管理層預測，年底水泥產能提前至5,000萬噸，卻未有對水泥價格回升作出預告。

此外，由於燃料佔生產成本三成，所以燃煤價格最近有迹象見頂，對水泥業或者有利，但更重要的是水泥價格幾時止跌回升，中期業績後，估計會令大行對水泥股全年業績向下修訂，目前兩隻水泥股一○年市盈率9.1倍及8.7倍，但已比亞洲同業11.9倍有折讓，或許短期刺激反彈的正面消息唔多，但壞消息出盡估值正處歷史低點，估計離底應不遠矣。